廣島三箭喺日聯歷史性封王！三箭喺上周六聯賽，主場4:1大勝櫻花；由於次席維加泰竟然0:1不敵護級心切嘅天鵝，令到三箭在只餘下最後一輪賽事的情況下，領先4分而提前奪標。三箭封王之後，將獲得2億日圓（約1,900萬港元）獎金，今季喺聯賽射入22球嘅射手佐藤壽人就表示，球迷係佢哋今季奪標嘅最大功臣。
榜尾方面，松鼠同鹿角贏波之後，宣佈護級成功；至於櫻花、勝利船、飛腳同天鵝，就4隊就只能活兩隊。櫻花最後一輪將迎戰前鋒，天鵝主場對早已篤定降班嘅岡薩多，勝利船就對冠軍三箭；佢哋都有機會拎晒3分；相反飛腳最後一輪作客山葉絕對唔易踢，護級形勢危危乎。
第3位將由砂岩、柏雷素爾、紅鑽、鯨魚同水手爭奪。砂岩目前形勢較好，不過佢哋作客水手，絕對唔易踢，至於紅鑽亦要主場硬撼鯨魚，柏雷素爾就作客無欲無求嘅鹿角；話唔定柏雷素爾最後可以彈出，搶走第3名兼奪得來屆亞冠盃資格。