「家陣好委屈妳咩？」以往被委屈嘅對象通常都係女流之輩，一係家嫂一係呀女，不過家陣足球之下人人平等，男人老狗都可以好委好屈，本周之最呢？是迪馬堤奧吧，用少陣費托啫、贏少咗兩場啫，咁就out得。若果曉士嗰款12場不勝係自然死，迪馬堤奧呢隻就係猝死，不過當個個替佢不值之際，難得佢又走人走得笑笑口喎，係心裏有數，又或係銀包有銀都好，總之就係冇大家諗得咁委屈囉。
咁會唔會係肥賓仲慘啲呢，大佬呀，都未曾開工啫，已經有人舉牌抗議嘞，一個改過自新嘅機會都唔畀人，同QPR嗰邊一個星期前已經有人寫定句「Harry Come Save Us」真係差天共地，肥賓俾人最唔妥嘅係響利記年代講咗句「我永世唔會教車仔」，所以話響球場上真係never say never，其實我幾肯定若果利記唔炒佢，佢真係冇本事過檔。當年講大咗，都係交戲啫，人在江湖，明㗎啦。又有唔知邊個話，成兩年冇工開，肥賓冇料到啦咁！嘩！呢種講法就真係令人厭惡嘞，完全違背咗中年再就業嘅精神，直頭係歧視人失業，咁哥迪奧拿唔使諗住重出江湖啦。
抑或係，油王先最唔抵呢，錢又我出嘅，話吓事都唔得，又唔方便響facebook留言（因為肯定俾人圍插），搞到全世界都誤會晒，根本就係搵迪馬提奧做臨時工，早知歐聯贏咗後就請佢走，仲清脆俐落，唔係啦，下次逐場計，冇手尾跟！
本來真係唔關費爵事，但老人家都忍唔住抽吓老對手水，潤呀肥賓冇做過乜就響CV入面多咗間世界級球會，冇做過乜？失業可以做乜呀，唔通肥賓響屋企日操夜操玩Football Manager又話你知喎。可能費爵見到自己個雕像終於矗立響奧脫福出面，所以high過龍，仲話好開心能夠在生一日見到自己個雕像好難得，其實都唔係好難啫，亨利響阿仙奴已經有，巴迪高響費倫又有，唔啱你去山頂蠟像館，要幾多個都有。所以可能費爵先最唔開心，英國傳媒都冇人敢明目張膽話佢大晒，香港TVB竟然夠膽影射話佢係幕後黑手，咁太太師奶們實信到十足十啦呢次。男人最委屈就係呢種，叫做「老屈」。