遠東發展（035）周三派2013年半年度 （9月年結）成績表，聞到有鑊氣，昅昅。遠展2012年度物業累售達48億銀，隨住呢批物業陸續入賬，已經為集團嚟緊嘅成績表打咗底。
雖然呢期香港政府引入新措施，紓緩樓市火熱市況，但遠展除咗香港以外，物業銷售組合遍及澳洲及祖國，物業發展應食住各地區嘅資產升值潮，繼續肥仔水。係咁意估遠展2013年度純利只增長20%咁大把，到貼近5.4億銀，預期PE跌到得5字頭單位數，吸引到痹。再講，遠展NAV 8蚊樓上，未計任何進一步嘅資產重估，現價（1.74元）折讓已經高達78%，睇見都流口水。買遠展博升破一年頂1.81元，去番現價PE 7倍水位，到2.30元，潛在回報率33%。
保華價殘可冷敲
保華集團（498）冇咗去年度出售港口資產收益，2013年半年度（9月年結）純利，跌咗七成到8120萬銀。但集團慷慨派高息回饋股東，以每股中期息1仙計，現價息率高達5.7厘，又集團呢個低殘價，NAV折讓高達83%，吸引到痹。呢轉冷吼，博上番一年阻力位0.22元水位，潛在回報率25%，保華未有耐上到NAV 1蚊。
錢雋