一架十零萬的二手凌志GS，任你點有想像力，都好難花到280萬！難道識變機械人？非也，只係香港飄移王James最新搞作，將GS300交由日本No.1改裝王HKS負責喪tune，大改造後馬力達到恐怖的880匹，可謂世上最快的凌志。
記者：徐影龍 部份攝影：黃子偉
280萬金錢技術打造
James一向鍾情Aristo和GS，離港征戰都係靠佢哋，最近居然癲到透過日籍飄移師傅谷口信輝，搭路搵HKS大改GS300，日本改裝王者出得手，當然不會只是調校一下電腦如此簡單。這部豪改280萬的凌志GS，可謂由技術和金錢打造出來，最近因活動而運到香港，近距離望跟James以前的車差不多，原來骨子裏HKS踢走了舊的3.0偈，換上另一副更大容積的3.7引擎，又將twin turbo換成更直接更大bar數的單turbo，行1.8bar時，馬力足足達到880匹！且不是由引擎計匹數如此取巧，而是HKS真正「落轆」計出來！單單副偈的研發及安裝費，已可想像到成本有多貴。
另一貴得有點嚇人的是車架，改裝商將之拆膠、點焊、浸藥水，為的是一個「硬」字，但又再花掉60萬。當然，全車其他如HKS電腦、sequential波箱、氣喉、胎軨等也是萬萬聲上落。可能你對這堆數字無乜反應，但話你知齋計拉花貼紙，埋單也要四萬元，夠你買一部不俗的二手車。只可惜這部「癲凌」來香港只作展覽，唔郁得車，想睇佢880匹有幾癲，要遲些上珠海參加James的飄移課程了。
明天機場博覽甩餐勁
這架豪改280萬的凌志GS，明天將在機場博覽館展出，觀眾只需即場捐錢給奧比斯，便可跟GS合照。同場還有James揸愛驅Aristo的飄移表演，可惜門票早已售罄，想重溫明天盛況，可在fb搜尋「James Tang」。
