七十年代社運中堅分子岑建勳退隱多年，早排反洗腦國民教育捲起浪潮，岑以社運老兵姿態出山，憤然絕食抗爭，氣勢震懾好多港人！近日呢又同公民黨陳淑莊傳緋聞，曝光率奇高，忽然高調，八方最近就收到風，岑建勳正籌備出新雜誌，重投傳媒業。
講政治講生活
江湖傳聞岑建勳蠢蠢欲動再搞傳媒，聽聞正低調組班，有曾同佢洽談人士透露，構思嘅新雜誌一書兩冊，一本報道政治時事新聞，另一本就以lifestyle為主，唔做娛樂新聞。出雜誌大計似乎唔係冇米粥，據公司註冊處資料，岑建勳今個月初剛成立咗間「自由人報有限公司」，英文名i-Freeman。
有傳新雜誌由《明報》前老闆、南海控股董事會主席于品海打本，公司註冊處資料顯示「自由人報」單一股東係岑建勳，秘書係屈家寶，屈亦係南海控股嘅公司秘書，即係于品海親信。
八方噚日打電話畀岑建勳，佢話身在北京，否認于品海係幕後老闆，笑住咁話「搞傳媒我搞唔到咩？如果要搞肯定我係大股東」。佢強調本雜誌十畫都未有一撇，「我都未諗到點搞」，又話「唔係淨係爭取民主咁簡單」，話遲啲有眉目自會公佈。
六四事件後，岑建勳因參與「黃雀行動」禁足內地多年，2004年先獲發回鄉證，近年喺內地做戲院生意。早年做過《號外》總編輯嘅岑建勳，喺呢個時勢重投香港傳媒業，相信會好受關注。
mailto:[email protected]