陶瓷工藝，由碗窰到廣彩轉型到今日，只剩下一系列陶藝教室，不論甚麼身份職業，名食店老闆、中醫師、設計師、老外和小朋友都樂在其中。大抵殊「陶」同歸，只要陶泥在手，都能在搓搓掐掐間找到真趣味。
記者：陳慧敏 攝影：劉永發、伍慶泉、楊錦文
欲速則不達
「大陶工作室」老闆Chris，算是香港第三代陶藝家，他認為很多香港人學陶心態頗現實：「學生好鍾意一入嚟就指住架上面啲杯問：『我要學幾多堂先可以做到呢一個？』我教陶瓷，從來唔會教學生做我嘅作品，因為你要開開心心做出自己作品，你先會滿意，跟住人哋嘅嘢嚟做，一來唔開心，二來都唔係自己嘅嘢啦。另外，學陶切忌心急，欲速則不達，你一心急，嚿泥就會唔聽話，燒完隨時爆裂，到時就乜都無。記住，做陶瓷最緊要開心，每每想着成品，唔會有好作品。」
那這代香港人的陶藝作品，會有甚麼特徵嗎？合夥人King：「其實都唔算有乜特徵，勉強要講嘅話，或者好似我手上呢隻杯咁囉。」她手上的陶杯形狀很有趣，粗大杯柄內藏陶製波波，一搖就會發出鏗鏘響聲，真有趣！港人創意還陸續有來，「有學生同樣整杯，杯柄竹笋形，上面寫住『好』同『秋』兩個字。」好詩意，夾起來與廣東話「好揪」兩字同音，「哈哈！係咪好無聊？」
陶瓷最簡單純粹
即使忙極，「囍宴」老闆兼大廚Jacky Yu在港的時候，都會盡量每星期去一次「大陶工作室」，原因好大路：「覺得放太多時間喺工作唔係好事，總得做番啲自己鍾意做嘅事，尋找番自己。」實情是因為製陶整個過程夠單純，「唔同畫畫，雖然兩者需時差不多，但對我嚟講畫畫仲大工程，我唔係話要畫到好似張相咁靚，但要畫到幅畫有生命就好難。做陶瓷，由搓一嚿泥到完成一件成品，攞喺手上嗰陣會好開心。」
他強調靈感來自日常生活，例如行街市見到阿嬸切蓮藕，就會想到弄一個蓮藕杯墊；把陶泥當湯丸搓，壓偏陶泥在上印個手指模就變成一個筷子座，可擺在「囍宴」使用，「呢個筷子座最受歡迎，店舖開張嗰陣已經有，擺喺餐廳成日俾人攞走，到今日我都仲做緊，添貨。」連創作靈感都來自街市與廚房，飲食與藝術確實同體，終明白他所說的「放太多時間喺工作」是甚麼意思了。
陶製碗碟盛藥材
這個年輕中醫師叫Clifton，經常見報為讀者介紹合時湯水，計劃明年出中醫藥書，但嫌用來盛藥材的碟子太悶蛋，「我想整到好似日本懷石料理啲碗碗碟碟咁，配合藥材同唔同季節用唔同盛器，所以個零月前開始學陶瓷。」可愛的想法，做出可愛的作品，花花碗與紅葉碗色彩着實豐富，我最愛他製作的小鯨魚，魚腩與魚頭皆開洞，「我諗住喺鯨魚肚種棵芽菜，芽菜長大標出嚟，咪變成噴泉囉。」
為展覽努力
做了多年產品設計師的Fion說：「我成個人磨鈍晒！」學陶藝本來只為減壓，後來索性辭工做全職陶藝師。她的作品少女味很濃，蕾絲吊墜、尖頂小屋，開滿花的小山丘等等等等，像引人走入童話國度，「做吓自己鍾意做嘅嘢囉。」現在她食積穀，所以幾個月後可能要找工作，但仍享受天天與泥巴玩遊戲的日子，現為個人陶藝品牌Mimuthings及來年三月的個人展覽努力，感覺非常快樂。
Fion的好姊妹Eva，則是在職時裝設計師，不知所故弄了個手柄大過杯身的大牙杯，於是開始製作巨型手柄杯系列。她現在沉迷大牙，也為十二月在「Soil」舉行的展覽會趕工，「我成個禮拜最期待上陶藝班嗰一日，成班人一齊傾偈整陶泥，好開心好搞笑！」但見枱面滿是一隻隻大牙，都未明白她想幹甚麼，惟有等十二月展覽啦。
大陶工作室（2528 0672）
地址：灣仔摩利臣山道33號幸運閣1樓
網頁： http://coboworkshop.com
慈善陶藝社
踏入第二十六個年頭，「樂天陶社」可謂香港最早一批的陶藝學校，陶藝家Fiona：「其實香港啲陶瓷工作室老師，都係七八十年代石灣陶瓷老師，喺九十年代外國讀完書返嚟，再開工作室開始。」
迫遷，「樂天陶社」由藝穗會搬到中環，做了很多慈善活動，希望藉此推廣香港陶藝，如印尼海嘯時，他們用一星期時間製作陶瓷義賣，籌得十萬元賑災；又如早年永利街李澤裕的活字印刷舖執笠，樂天陶社也策劃了一次陶藝義賣，學員都用李伯的活字粒在陶器上刻字，賣到的錢捐給李伯幫補生活，Fiona：「不過我啲學員係外國人，英文法文德文乜都有，中文字粒我哋真係執唔掂，所以啲陶器淨係可以印英文。」為宣揚環保，Fiona又製作了一批陶杯，送給斜對面的「公利真料竹蔗水」，好讓他們減少用紙杯。學員們說製作陶器可以全神貫注，喜歡那種心田一片淨空的感覺。
樂天陶社工作室（2525 7949）
地址：中環荷李活道29號3樓
網頁： http://www.potteryworkshop.com.cn
陶藝Discovery Channel
撇開古董陶瓷，香港既然有的是陶藝教室，卻還不流行買賣陶瓷，何解？「藝舍創作室」創辦人賴志剛在浸會大學教陶藝，1987年讀書時已被學校欽點，向英女皇展示製陶技巧，「一來香港人屋企細，得嗰幾百呎，唔好話藝術品，雪櫃都未必夠位擺啦！二來就算幾出名嘅藝術家，作品開價幾千一萬，你又會覺得好貴。其實你計吓，我一件作品通常要製作五十至一百個鐘，根本唔貴，仲有原料？燒工？油錢？場地錢？」
明白獨一無二的藝術品不能同工廠貨相比，但打開銀包，始終要面對現實，所以好多陶藝家都會開班授徒維持生活。現在很多中小學都跟藝舍合作，拉大隊來上陶藝課，也有藉此教學生各種物理配搭與變化。賴志剛：「陶瓷仲有好多得意用法，例如喺飲河水或井水嘅落後地區，低溫陶瓷可以用嚟做濾水器，陶瓷裏面嘅細孔可以透水，同時又可以隔開細菌同過濾性病毒。仲有，我哋仲可以利用陶瓷的透水同吸熱特性，將水降溫……」阿Sir即是阿Sir，我彷彿看了一集《Discovery Channel》，失敬了。
採訪當日，見到小朋友Yondi跟爸爸一起搓陶，想是爸爸教仔，誰知爸爸說：「唔係，係我抄緊佢嘅設計至真。」Yondi兩歲半開始愛上玩泥的觸感，現在四歲半的小手，搓出來的長頸鹿圓圓潤潤，紅巴士裏面還有軚盤，還被老師選中參加比賽。
藝舍創作室（2690 1238）
地址：火炭黃竹洋街6號嘉民沙田物流中心二期19樓
網頁： http://www.arthome.hk