【中環】趙世曾長女趙式芝（GiGi）同波爾錶太子女楊如芯（Sean）前晚喺中環太子大廈嘅Sevva補擺結婚酒，楊其龍、傅明憲及王馨平等幾十位好友應邀出席，GiGi同Sean嘅一對愛犬Bubbles同波爾多都有在場。婚宴以彩虹做主題，場內播出GiGi同Sean嘅生活相，亦有喺法國巴黎鐵塔下影嘅婚照。其間Sean領禱，之後又同GiGi切蛋糕，仲各自感謝身邊摯愛同好友，場面感動。兩人將特別喺法國訂嘅香檳、Sevva蛋糕，用GiGi設計嘅紙袋袋住送畀賓客。
全程儍笑
眾人玩到約凌晨1點就陸續離開，GiGi換上牛仔褲走人，見佢心情興奮，全程儍笑，佢同四洲太子女戴凱欣等一齊走，一出門就向左行，而Sean離開時反而向右行，飲醉晒、腳步浮浮嘅Sean，要由霍汶希、陳祉妤（前稱陳沛嘉）等左右夾住一齊行。之後GiGi同Sean各自坐車返大坑道屋企，GiGi落車後好體貼咁企喺口等Sean，Sean到埗後GiGi就攬住佢等，再一齊返上樓。
採訪、攝影：梁繼光、黃曉程、彭琮然