對徐淑敏（Suki）同老公黃浩嚟講，呢排都算係多事之秋，繼日前爆出有藝人曾經喺佢哋經營嘅食肆吸毒，有兩名前員工向黃浩勒索聲稱擁有藝人吸毒短片後，前晚Suki同黃浩又去到馬鞍山警署報案。原來Suki經營嘅網上美容店向顧客交付貨品嘅時候，貨品下落不明。
黃浩同Suki報案一個鐘後，喺警署門外接受訪問，見Suki好攰又冇心機，黃浩代解釋事件：「我哋收order，出咗貨但係收唔到錢，因為個客投訴收唔到貨，所以中介公司就hold住咗筆錢，暫時損失四位數字。」
疑有人冒簽
黃浩又話負責送貨嘅速遞公司話貨品當時有人簽收：「可能係有人喺簽收時冒簽冒充收貨，家當報失處理，希望杜絕同類型事件再發生。」
撰文：馮仁昭
