想睇TVB新聞小花？今日要稍移玉步喇，事關八方版主許偉賢今日有喜，同隔一條街TVB新聞部嘅記者林子豪拉埋天窗，大批小花做完6點半新聞就會去婚宴現場。八方聽聞，平時行開型格路線嘅許小姐今日會奇招出擊，低胸露背唔在講，仲會打破慣例着裙──婚紗出場，一眾小花想搶鏡都唔係咁易。
擺40圍無翅宴
堆填區地靈人傑，新聞王子林子豪同許小姐並非相識於「心曠神怡」嘅將軍澳。「據了解」，兩位政治記者6年前喺立法會撻着，「消息人士」話係男方做主動，主動做咗乜八方就唔知，不過記得當年兩人諗住搞地下情，但搞唔夠一個禮拜就俾行家撞到拖手仔，頓成全行佳話。
「消息人士」又話，男方上年喺德國旅行時求婚，細節就「聽日一齊《講清講楚》」，今晚會擺40圍無翅宴，同梁福元娶新抱對撼，政壇同傳媒行家記緊要不醉無歸，所以唔好揸車，齊齊留意今日先公開嘅神秘婚照，林太有驚喜畀大家。