噚日港區人大選舉會議先啱啱選咗主席團，已經有左派元老大鬧主席團選舉黑箱作業，衰過大陸選人大，班有阿爺祝福嘅尸位素餐、人大代表變成父子世襲，真係數到港區人大代表有咁臭得咁臭，不過今次公開數臭港區人大選舉，並唔係泛民中人，而係前港區人大代表、同「影帝」溫家寶影過相嘅吳康民。正所謂事出必有因，《明報》噚日刊出吳康民數臭港區人大代表文章，有政圈好事之徒同八方分析，自從回歸之後，港區人大慢慢變成香港親共新貴、以及富二代嘅政治俱樂部，反而要班傳統左派人士讓個位畀佢哋，吳校長見到咁嘅情況、真係唔火滾先奇！