環球經濟麻麻，國際拍賣行東來香港舉行拍賣會，打強國人主意，蘇富比藝術空間今日起一連三天首次展出蘇富比倫敦拍賣會（12月5日舉行），同蘇富比紐約拍賣會（2013年1月31日舉行）重點天價拍品，兩場拍賣會都係西方古典油畫，全部免費任睇。
來港展覽吸引強國人
當中倫敦嘅拍品，總估值逾5億港元，其中貴絕全場嘅係意大利文藝復興時期嘅巨作、拉斐爾《青年使徒頭像》，估值1.88億港元。
蘇富比亞洲區主席Patti話，近年亞洲收藏家（即係強國人啦），對西方古典油畫好有興趣，所以將啲最頂尖嘅西方古典油畫送嚟香港展出。好似拉斐爾《青年使徒頭像》呢幅素描，過去50年只係出現過兩幅重要性相若嘅拉斐爾素描咋，分別創下當時西方古典素描作品嘅拍賣紀錄。
點解唔到大陸搞拍賣會？收藏家唐楚男話，因為內地拍賣抽好重嘅稅，所以拍賣行特別鍾意喺香港做生意，連內地知名拍賣行中國嘉德，上月都首次來香港搵食，今日一連兩日就輪到保利到港搞四場拍賣會，拍品總值4億元。當中張大千嘅《携琴訪友圖》，估值3,000萬元。
