兩年前，香港樓市買家領教了一度震撼市場的額外印花稅（SSD）措施，人們以為趕絕了短炒客，樓價起碼會平穩，但投資者索性短炒變長揸，兩年間放盤急降，樓價更步步高升。上月政府宣佈「加強版SSD」，新買家要再綁多一年，盤源繼續縮，樓市尚未死，但周邊行業卻得番半條人命。
記者：葉淑貞
在SSD公佈前，中原樓市指數報88.24（2010年11月15日至21日），但指數最多只曾回落不足1點，此後一升無回頭，截至本年11月16日，指數為116.81，換言之，兩年升足32%。指數升不斷，但成交宗數大減，SSD前住宅成交宗數每月平均過萬宗，現時跌至平均每月六、七千宗，跌幅約三成。
裝修行業勉強維持
「你買層樓咁貴，仲有冇閒錢裝修先？」年過50歲、黑黑實實的鄧師傅說：「以前啲人收樓，幾乎必定大執廁所同廚房，家除非好舊好殘，否則都盡量唔整，始終呢兩部份費用最貴，淨係廚廁都要十萬蚊埋單。我好彩有班熟客的小型維修，勉強維持住。」
裝修行業受樓市成交減少影響，是不幸中的大幸，皆因裝修師傅本來就青黃不接，唔夠人手開工，如今工程減少，師傅還未致於開工不足，但判頭就非常頭痕，「物料、工資都貴，呢兩年有升冇跌，工程計數要好小心，否則做埋唔夠蝕。」
另一相關行業的室內設計亦情況相近，Helen（化名）原在一設計公司做兼職設計師，在好景時，她逐份工作計錢，平均月入兩萬多，認真優哉游哉，但最近已接獲公司通知，聖誕後結束賓主關係，主因亦是生意下跌，「冇所謂啦，遲啲先算。」原本只是做兼職的Helen，暫時不當失業是一回事。
3萬代理搶10萬張單
至於在世紀21任職的劉先生，09年入行，趕上未有SSD前的貨如輪轉，「入行前做採購，但內地改革開放後，甚麼人才都有，採購這行冇得做，於是轉行做地產，心諗點都好過做保安吧？」
這三年，見證樓市大旺及冰封，「家放盤少、換樓難，行內一般只係搵萬五、萬六蚊左右，同以前冇得比。雖然樓價高，佣金相對亦高咗，但流轉量細，全年約10萬宗物業成交，由三萬幾個代理瓜分，即係每人每年做兩三單，個餅唔夠分。這行好講運氣，有些新仔剛入行一個月就做到三、四單，不是運氣又是甚麼？」
他說最近向行家「收風」，都知道不少同行結業，「前景？坦白講大家都幾灰，但換轉其他行業一樣咁艱難，做小生意也敵不過貴租。好彩買咗樓，唔使捱貴租，家可以再守吓，冇買樓的行家就慘啲，若唔做呢行，有些人會去揸的士。」