由「南早」變左「紅早」嘅《南華早報》噚日又擺烏龍，A1頭版將公民黨梁家傑議員張相，換錯咗做基本法委員會副主任梁愛詩（詩姑），最大鑊係相下面直接套用「相中人」說話，去批評港澳辦副主任張曉明，好一幕「借刀殺人」。
張曉明撰文指有外部勢力干預香港選舉，特區應該適時就23條立法，《南早》訪問梁家傑回應，傑哥批評張曉明言論「不合憲、不道德」，文章內容冇事，張相卻變成詩姑。《南早》行家稱，呢次有人出錯，噚日收到唔少讀者投訴，網上版已更正，今日會刊出更正啟事，據講暫未有人要起身。
其實《南早》近年間唔中都有蝦碌嘢發生，上年報道拉登（Osama）被殺新聞，標題寫錯成美國總統奧巴馬（Obama）被殺；前年頭版刊登胡錦濤訪美照片，相片中說明竟寫成維權人士「胡佳」，真係嚇死朕囉。