「我係同志！」何韻詩呢句勇敢出櫃宣言，全城激讚，不過同前輩張國榮相比，震撼程度仲差好遠，尤其當年同性戀依然係洪水猛獸，絕對冇家咁開放。
話說1996年12月，哥哥喺紅館開24場《跨越九七演唱會》，就用一曲《月亮代表我的心》相贈唐唐（唐鶴德），當時哥哥喺台上話：「唐生係我媽媽以外，生命中至愛嘅人。」哥哥同唐唐嘅關係雖然公開，但兩人對戀情始終有所避忌，喺公開場合唔會有親暱動作。
直至01年9月28日凌晨，哥哥終於衝破心中嘅最後防線，當晚佢同一班好友去跑馬地酒吧「Alabar」消遣，好勇敢咁同唐唐手拖手步入酒吧，入到酒吧仍然唔肯放手，愛得勇敢坦白。哥哥雖然離我哋而去，但佢對愛情嗰份堅貞同勇敢，始終長存歌迷心中。
撰文：阿Wow
