又有讀者來函要求告知以前在本欄介紹過嘅「健康跑步樂」及「游泳跑步樂」可以在哪一間書局搵到，左丁山曾收到出版社負責人來郵話大書局皆有出售，請讀者李先生到三聯、商務門市部去問吓。
小YY來電問左丁山可唔可以代佢撲飛聽爵士樂，爵士樂音樂會都要撲飛？據小YY講呢個音樂會叫做「Howard McGrary的爵士聖誕」，於十二月一日星期六晚上在演藝學院舉行，門票異常搶手，一票難求，與McGrary同台演出嘅有中文大學合唱團，所有演出款項扣除支出後，用作資助未有經濟能力往海外演出嘅學生。
好多人都唔知中大合唱團已有近四十年歷史，多年來走遍東南亞及中國南部，向普羅大眾推廣，分享合唱藝術。中大合唱團嘅音樂總監兼指揮朱振威有咁啱得咁蹺在十一月十日晚上之香港中樂團/龔冬健音樂會，就坐在左丁山身旁，佢當晚話俾左丁山聽中大合唱團會在明年一月到台中參加台中室內合唱團之交流演出，成大班人去，所需經費不少，好多團員要自費全費參與，但如此一來，經濟能力稍有不足嘅團員就只能眼光光，留在香港照地堂，故此中大合唱團成立一個叫做「乘着歌聲的翅膀」贊助計劃（On Wings of Song），每年籌款，何為乘着歌聲的翅膀？左丁山讀書少，要翻閱資料先至識得此乃德國詩人海湼（Heinrich Heine）詩作，該四句（中文譯本）係：「乘着這歌聲的翅膀/親愛的隨我前往/去到那恆河的岸邊/最美麗的地方」，此詩經孟德爾遜譜曲（Felix Mendelssohn），流傳全世界，上YouTube一搜查就搵得到。
後來睇電視新聞，見有家長抗議香港教育改革之後，教育局推出「一年一學藝」，聽就非常好聽，帶學童走出課室，不死背書，每年學習一門課外活動，但推行起來，要錢嘅哩，一啲富有學校不時帶學生出門做field trip，使費動輒一兩萬，清貧學生家長點同你玩？（按：故此一啲直資學校話明俾獎學金予基層學生，都未必有人申請入學）一間「無錢」中學校長對左丁山講過：「我地動用學校若干資源，資助一啲真係攞唔出錢嘅學生參加遊學團去南韓，去完返來，啲窮學生開心到不得了，話眼界大開，但我地唔可以到處去，又冇錢資助更多學生呢！」中學生如是，大學生亦然，並唔係個個大學生都家居干德道、羅便臣道，中大合唱團辦籌款音樂會，值得支持。