楊千嬅與熊黛林等前晚在中環出席雜誌的美容頒獎禮，千嬅鼻子爆瘡，原來她剛從北京工作八天返港，但爆瘡兼患大感冒，在家要與囝囝Torres隔離，又要戴住口罩蒙面，搞到阿仔不認得阿媽。千嬅決定在愛子1歲前不接長期離港工作，又肉赤囝囝早前拍慈善月曆時被閃燈閃親。
楊千嬅、丁子高與熊黛林等前晚在中環四季酒店出席美容頒獎禮，千嬅到北京錄影節目八日，患大感冒回港，鼻子更爆大瘡。雖與愛兒Torres分隔多日，回家卻要隔離：「離遠望佢，陪月抱住，佢唔會唔記得我，但見到蒙面、戴口罩就唔認得，聽聲變咗男人。」她謂這樣忙碌主要是還產前的合約債，她將再為錄影節目離港，每周花五天錄一集：「唔開心，會錄到喊，可以同老公視像，但個仔以為用電話對住佢。」問她敢不敢接長期離港工作？她說：「喺佢一歲前唔想離港，有電影搵我，但走一個半月，我話等佢一歲先，飛咗去，個心又唔喺度，對大家唔公平。」
千嬅兩母子早前為香港思覺失調學會拍攝慈善月曆，她謂起初想保護兒子，但為了身教做慈善才讓兒子出鏡，她母愛大發的說：「好肉赤，閃光燈兜頭閃落去，唔知會唔會閃到眼。」
願與城城合作
另一邊廂，熊黛林露半股拍公司月曆，被男友郭富城讚身材好，熊黛林謂先送一本給他試反應，問城城是否睇過晒其身形？她避答，講回月曆說：「自己覺幾靚，今年唔使諗聖誕禮物。」二人戀情浮面，城城講熊黛林時都被指含春，熊黛林說：「人逢喜事精神爽。」但否認喜事是婚事，只是城城新片《寒戰》叫好叫座：「我前兩日睇咗，媽媽喺南京睇，佢話票房應該過三億。」她謂不會與城城私人慶祝，再去旅行就要看時間。對於城城有意拍喜劇，熊黛林謂求之不得與他合作，讚他不工作時很搞笑。
同場的廖碧兒，睇好徐子珊及楊怡奪視后，問是否覺得舊愛陳豪的女友陳茵媺不夠班攞視后？她謂沒有睇劇及沒合作而不清楚。扒女李依琳與男友郭翰平現身，她表示男友是許晉亨遠房親戚，二人從小學開始已是同學，男友比她年輕一年，拍拖近六個月。
採訪：林嘉慈
攝影：葉君海
