分銷五糧液嘅銀基（886）近期成為焦點，除因塑化劑事件外，彤叔掟貨、劉央硬接亦富趣味性。劉央噚日出席人保（1339）投資者推介會，就不停推介銀基，大有騎劫味道。雖然越買越跌，但劉央滿有信心話買到平貨要多謝彤叔沽貨。故事一日未完，都未知鹿死誰手，一於放長隻雙眼睇戲。
唐牛都要同劉央講聲多謝，皆因早前佢將持股12%嘅全通（633），減持至不足5%後，本欄立刻推介戰友買入，理由係龐大沽壓全消，不出所料，全通往後直線向上，半個月累升13%，明顯跑贏大市。
銀基好戲未落幕，另邊廂星爺終於有戲上，佢旗下嘅比高集團（8220）剛舉辦《西遊．降魔篇》電影發佈會，呢部2013年賀歲片係比高頭炮，亦係繼08年《長江7號》後星爺新作，質素肯定有保證。近排比高股價有異動，成交亦由幾十萬股變成球球聲，相信係憧憬比高可以憑新戲扭虧為盈，戰友可多加留意。
唐牛