在沒有特別好消息之下，港股兩日乾挾500點，但呢兩日藍籌升、二三線跌，反映資金趨於防守，泊去REITs、公用股，似乎後市隱憂不少，暫時入市不宜勇進，加上盈富基金（2800）沽空比率日日高逾四成，小心、小心！
新股死寂咗成年，終於有點起色。「巨無霸」新股人保集團（1339）料下周一（26日）起招股，集資278億銀，係今年最大新股。受惠股係乜？魏力嘅答案係亞洲金融（662）。
據銷售文件指，人保H股招股價介乎3.42至4.03元，代表上市前市值介乎960億至1133億人仔；上市後就介乎1416億至1668億銀。亞洲金融近年不斷向人保增資，令持股量維持喺5%，相信就係等人保上市大賺一筆。以上市後1500億元市值計，亞洲金融持股5%就值75億銀，足足比目前市值（37億元）多一倍！近期股價持續向上，相信就係炒呢個因素。
再睇埋業績，上半年賺2.5億銀，大增1.6倍；收入升28%至6.88億元。現價PB得0.61倍，以保險商而言平到笑。保守估全年賺4億元，預測PE為9倍，價值仍處於剛獲發掘的時候。昨日成交創一年新高，料有聰明錢開始進駐，順勢買入，坐四望五唔算貪心。
魏力
http://www.facebook.com/2012jason