本港上月通脹率3.8%，高過預期。打工仔固然陰公，要養B更苦上加苦，事關「必要」開支近年急增，養B支出分分鐘勁過通脹。
「必要」消費先是「百日宴」，龍媽唔使好似坐月時蓬頭垢臉，可以靚住出席，老人家話「百日宴」是以前為擔心小朋友養唔大而設，真相無從稽考，但見屈原死忌大家扒龍舟咁開心，相信都百無禁忌。
繼互曬婚紗照、大肚照後，近排星媽人人最少有一套龍B沙龍，在商家無限創意下，咁多「必要」開支，最低消費其實點止李麗珊個400萬？
龍B生意做唔停，能夠風光到最後的龍B概念股卻不多，當中奶粉股雅士利（1230）表現突出，做嬰幼兒營養品的合生元（1112）上半年純利增長40%至2.74億元人仔，營業額亦大增57%，該股噚日收市前急速向上，收報22.90元，升6%，圖表呈頭肩底，看來快將開車。
Samantha
本欄逢周一、三、五刊出