【本報訊】中央政策組首席顧問邵善波以謬論擴權，前政務司司長陳方安生怒斥邵善波以為自己是特首梁振英的「忠實家僕」，忘掉自己是一名要遵守規章制度、保持政治中立的公僕。陳太更將矛頭指向「大話精」特首梁振英，指梁治港「冇章法、冇規矩」，促他盡快交代僭建問題，否則難以挽回市民信心。
記者：呂浩然 姚國雄
陳方安生昨日出席電台節目時表示，邵善波近日言論令人搖頭嘆息，她指中策組的職能是為特首、政務司司長和財政司司長廣納民意，惟邵善波「偏離咗原有設立呢個中央政策組嘅原意」，反映邵「似乎認為佢自己就係行政長官嘅忠實家僕，佢似乎忘記咗佢家擔任嘅係一個公務員嘅職位，公務員係有既定嘅制度，有規章，每一位人都要跟從呢啲規章」。
「政府唔係私人嘅機構」
曾為十八萬公僕之首的陳太進一步指，即使邵善波以合約形式聘用，但仍然是一名公務員，「佢嗰個位係一個公務員嘅職位，只不過係喺聘用條件嗰度稍為有啲變，但呢個並不影響佢要保持政治中立」。陳太特別強調，中策組要改變職能，應該先提出理據和事實說服立法會和市民。
此外，陳太質疑由中策組全職顧問高靜芝獨攬公職人事任命恐力不從心，因高靜芝不可能熟悉所有政策範疇，故難以處理所有委員會的任命，認為若梁振英想解決不同委員會委任同一人擔任成員問題，只需訂下機制便可。雖然港府稍後向立法會申請撥款，將第四名中策組全職顧問常規化，並不影響到高靜芝，但陳太期望議員「好好哋去審查」，並在明年通過預算案時繼續跟進。
訓斥邵善波之餘，陳太亦點評梁振英上任以來的過失，狠批梁振英治下的港府「冇章法、冇規矩，似乎行政長官鍾意點樣做就點樣做，但係政府嘅架構唔係一個私人嘅機構，唔係話老闆話事就乜都可以做㗎嘛」。
強推問責制致今日困局
陳太以中策組一事為例，表明若由她出任政務司司長，必定先要求在內部討論中策組是否有需要擴權，暗指梁振英事前沒有與兩名司長討論過。
陳太又說回歸前後的行會成員表現有天淵之別，梁必須放棄親疏有別，認為「我覺得最大嘅問題係，佢一日唔能夠清楚交代佢呢個僭建嘅問題，佢一日都唔能夠喺市民嘅眼中係有公信力，所以最重要嘅係首先佢清楚交代先，然之後將呢件事放開」。
總結現今政局問題，陳太仍舊相信是強推問責制之故，「呢個構思由始至終都係一個非常之壞嘅構思，先天不足、後天又失調，既然你要行呢條路，咁你喺協調嗰方面，喺建立政治任命官員同埋公務員之間嘅信任……呢一方面都唔做工作，所以今時今日你見到個政府淪落到呢個咁嘅地步」。
陳方安生語錄
評梁振英施政：
「家似乎係完全唔使理會㗎，冇章法、冇規矩，似乎行政長官鍾意點樣做就點樣做」、「我覺得最大嘅問題係，佢一日唔能夠清楚交代佢呢個僭建嘅問題，佢一日都唔能夠喺市民嘅眼中係有公信力。」
評中策組濫權：
「今時今日聽到邵善波呢番言論，佢似乎認為佢自己就係行政長官嘅忠實家僕，佢似乎忘記咗佢家擔任嘅係一個公務員嘅職位，公務員係有既定嘅制度，有規章。」
評新班子表現：
「納稅人畀緊啲局長30幾萬人工一個月，唔係話叫佢哋出嚟好似小學生，企喺政務司司長隔籬，一句聲都唔出，如果唔稱職嘅就應該炒啦」、「政府簡直不知所謂，你睇吓一眾高官、行會嘅人嘅質素，係唔係我哋香港今時今日真係冇適當嘅人才？」
評論林鄭月娥：
「試問一個人可以作為整個政府嘅代言人做得幾耐呢？林鄭月娥已經瘦咗10幾磅啦，咁再咁樣落去，我恐怕佢支撐唔住。」