政府鋪天蓋地狂播誤導性新界東北宣傳短片，但係條片粗製濫造，相信都係為趕出街而事事旦旦。政府最新一條短片以70、80年代嘅沙田做主角，希望大家支持東北發展，點知輔仁媒體報道，facebook嘅沙田友逐一踢爆短片有好多穿崩位，睇到你噴飯。
壽全樓本來叫做第七座
片中一段影住瀝源邨，以壽全樓取景，有沙田友話，瀝源邨最初各座都係只有座號，係冇中文樓名，要等到90年代先為各數字樓命名，直到2006年外牆翻新工程時，先至取消座號，「壽全樓係70、80年代間應該叫做『第七座』」。
至於片中嘅87號巴士，沙田友話，呢架87號竟然使用丹拿珍寶型號：「就算我唔係巴士迷，都記得87線從來冇用過丹拿珍寶，而只係用過勝利二型和奧林比安。」
沙田友仲睇到，片段睇到瀝源邨福海樓三樓商舖出面嘅通風管，但原來舊時係冇通風管，因為以往商舖好多都冇冷氣系統，毋須裝通風管，係直到近年連鎖店進駐先有，仲有變電站嘅門牌，竟然係顏色鮮艷，絕非70、80年嘅產物囉。