香港興業（480）同系嘅興勝創建（896），估值比前者更為吸引。興勝啱啱公佈完業績，半年純利1.16億元，期內賣樓利潤約佔6000萬元，加埋6200萬元嘅投資物業重估淨增值，同租金收入、建築業務各近1000萬元嘅利潤，造就靚仔業績。
事實上，興勝係一隻微型地產股，近年開始收成。截至9月底上半年度賣樓營業額2.13億元，賺6000萬元左右，主要係賣九龍塘EI8HT COLLEGE嘅單位，項目只剩1伙未賣，家陣以5800萬放售，相信好快賣出。
另外，興勝明年初將推售大角嘴The Bedford工廈項目，市場估值約4.2億元。淨係呢兩個項目，睇嚟可以保證興勝未來一年賣個滿堂紅，單計賣樓，未來12個月隨時收番5億元，收入增長不在話下。
仲有預計2014年底竣工嘅豪宅佐敦The Austine，另外元朗、屯門幾個項目規劃中，興勝嘅樓盤基本上長賣長有。
樓盤長賣長有Keep住賺
興勝擁有多項工廈投資物業值4.3億元，上半年度收租930萬元，年度化每年租金收入約1800萬元，回報率4厘多啲，估值合理。呢Part就當抵銷淨負債4.5億元。
至於建築業務，正常情況下利錢比較薄，尤其係政府項目，唔算係好賺錢嘅生意。不過，未來幾年香港將會大興土木，所以泰昇集團（687）已經將地基業務四成權益賣番畀管理層，收埋自己賺，證明係好嘢。晉佳估計，興勝嚟緊建築生意都能夠大幅上升，為業績帶嚟增長動力，加埋物業發展業務同收租物業，未來兩三年應該係三翼齊飛。
興勝市值6.6億元，基本上同殼股無異，但收埋唔少靚物業等住賣，市賬率0.62倍，風險相當低，問題係查氏旗下股份估值長期偏低，睇隻香港興業就知。不過，興勝股價9月初由0.9元起跑，至今累升五成，表現比興業好，呢個趨勢有條件Keep住，所以小注買入中線持有係唔錯嘅選擇，目標價定市賬率0.8倍嘅1.75元。
晉佳
本欄逢周一、三及五刊出