現今的攝影世界，相機像素與機能已成了主流的追求，但主流之外，卻仍然有一班另類影友一切以感覺行先。Lomography的相機無靚鏡，無高科技，但憑着不確定性的夢幻影像俘虜人心，20年間逆市而行，粉絲越來越多，而超級粉絲表哥的故事就由一部小小的LC-A開始。
記者：韓繼聰 攝影：潘志恆
最愛平凡老大哥
講到Lomography當然不得不提老大哥LC-A，事關因為兩位維也納學生發現初代俄製LC-A而於1992年創立Lomography，發展出多姿多采的另類菲林世界。無獨有偶，超級粉絲阿Ming（香港Lomo界人稱「表哥」）的Lomo故事，亦是由LC-A開始。雖然LC-A唔係表哥的第一部Lomo，但卻是它開啟了表哥的Lomo思路，「其實頭兩部Lomo都影唔到心中所想的效果，到用LC-A先真正開始研究及影出滿意作品，更影出得獎作品。」表哥笑說。而如今他擁有的三部LC-A中，其中一部係一項國際性比賽的獎品，「雖然我擁有好多罕有的特別版Lomo，但就整個Lomo歷史及個人意義上，這部普通平凡的LC-A始終係我最愛。」
超級粉絲 珍藏過半百
做得超級粉絲，表哥珍藏當然多，由10年前開始初探Lomo，到現在已經有過半百Lomo相機，都未計其他「濕碎」精品。問到表哥最珍貴的收藏品，佢諗咗好耐都答唔出，事關好多都非常罕有，結果經一輪篩選，Paul Smith版Fisheye成功「當選」，「呢部機當年只有倫敦其中一間Paul Smith有得賣，連限量幾多部都唔知，好辛苦先搵朋友幫手買到，但忘記用多少錢了！」
殊不知表哥諗諗吓又話有部仲罕有：「全白Rudolf Diana聖誕特別版，得香港有得賣，限量50部，上網都搵唔到。」除了罕有相機，一些非官方產品其實都甚具意義：「好似Tee咁，其實係世界各地Lomo粉絲或組織自製，唔係特別版，但我好鍾意。」呢啲Tee可謂見證表哥與其他Lomo友的交流及友誼，當然別具意義。
正因LC-A在Lomo中的不變地位，來到20周年Lomography要出特別版相機，自然非LC-A莫屬。呢部20周年版LC-A+全球限量1,000部，機身以藍色鱷魚紋皮布包面，機背有20周年金屬徽章，每部更有獨立編號及證書，相信表哥與粉絲會流晒口水。
20周年派對八折迎賓
Lomograghy將於今晚七點在上環普仁街店舖舉行20周年派對，記住帶張你影嘅Lomo相片，有機會有禮物收。另外，今日兩間Lomography店舖的全線產品八折（除菲林外），係咪粉絲都不妨去睇吓。
查詢：Lomography（2915 2205）