數經典跑車，Porsche 911必定名列前茅，「有錢一定買架波子！」更是多數男人常常掛在口邊的話。借來新一代911 Carrera S長測周末，溫柔狂野兼備的特性不單令人精神分裂，軟硬兼施的冧功更令我感受到911的魔力所在，似乎我都感染了波子症候群。
記者：許維雅 攝影：林栢鈞
高速入彎值得信賴
成日都聽見有人話：「近年啲波子越嚟越好揸！」有幾好揸？真係要慢慢試過先知，有機會做三日911 Carrera S車主，當然要把握機會周圍去。新一代911予人的第一主觀感覺，原來真係好易揸，操控靈活、重心又低的優點，無論是轉向準確性，還是高速穩定性，都帶來十分舒適的操控，即使女生都可以輕易駕御。當走到時速過百的高速公路，你就會忍不住手啟動Sport plus模式，引擎反應變得更生猛，轉數即時提升、軚感懸掛更加實在，400匹馬力所帶來4.1秒的0-100km/h加速感，令人熱血沸騰，所以Sport Chrono Package Plus呢項Options一定要加，$19,400無得慳，否則只會浪費了它的性能。配合911多年來的跑車基因與各方面的新設定，即使高速入彎亦令人感到好值得信賴，絕對放心隨時爆隨時有，斯文又得，狂野又得，好易令人精神分裂。
實際油耗14L/100km
好多人怕揸跑車就係驚大食，新911亦有努力減胃口，轉波速度快的PDK雙離合自動波波箱固然有功，一般行車會盡量保持二千轉以下，Auto Start/Stop停車熄匙系統亦有幫助，即使呢三日經常玩高轉推背，平均油耗亦只是約14L/100km，以跑車而言，可接受啦。值得一讚的，是停車熄匙系統反應好快，未有太過阻慢911的起跑速度。五圈錶板的彩色小屏幕可顯示G-force引力分佈、計時、胎氣氣壓量度及導航等，雖資訊過份豐富，但感覺好玩新鮮。有埋享受一流的BOSE音響、可作軟硬調校的跑車桶椅等豪華配備，半秒也不捨得離開車廂，不單止我，連身邊朋友也不介意依然難坐的後座Dog Seat，個個齊齊爭住坐。
911 Carrera S
引擎：3,800cc水平對向六汽缸
馬力：400hp/7,400rpm
扭力：440Nm/5,600rpm
傳動：七速PDK雙離合器自動波
售價：$1,979,000起
查詢：2926 2911（Porsche Centre HK）
試完即中毒
早前熱爆網的《HK Style》 MV其實是由Crossfade Creative製作公司一手包辦，老闆兼MV、廣告導演的阿權：「古巨基叫我仗義幫忙，我一口答應，皆因我覺得好玩。」工作經常接觸到車，MV拍過車、見過好多明星靚車、幫新車發佈會做過好多條動畫，同時兼係香港理工大學設計系教師，阿權對車自有一套審美標準，「我鍾意第一眼睇車頭燈設計，現代科技有LED燈幫助，令到頭燈越來越吸引；其次就係車身線條。」阿權一年多前，貪得意去試Audi A5之後就買了一架，今次試完911亦立刻中毒，「操控靈活、直接、輕盈，你想點就點！911係好夠代表性的車系，外形Classic，性能又越來越突出，佢一定係我下一架新車的目標，最重要係佢日常代步揸都得。」
