近排為免費電視牌而惆悵嘅商務及經濟發展局局長蘇錦樑，可能唔得閒做運動Keep Fit，有證據懷疑佢投靠男士纖體公司。有網民發現，蘇錦樑嘅fb like咗Dandy House，即係丹邸好士男士美容專門店。呢間公司聲稱係日本最早創辦嘅男士美容中心，包攬男士纖體、美容、脫毛、除暗瘡。唔知局長like邊樣呢？
蘇錦樑新聞秘書回應話，呢個like唔係蘇局長like嘅，亦都唔知點解會like喎，咁係咪有人用咗蘇錦樑嘅fb戶口like纖體公司，秘書都話唔知。總之，佢話蘇錦樑不曾光顧該店服務，局長已取消有關連結喎。