【本報訊】本港租金猛於虎。今年樓價升了兩成，租金亦連升八個月，累升17.5%至上月平均呎租22.2元，再創歷史新高，今年首十個月累升13.8%。小市民買樓無望，為應付租金支出，加倍節衣縮食。有心置業的市民慨嘆：「梁振英出啲招根本冇用，否則樓價都跌咗啦！」記者：陳新政 朱連峰
年近50歲的陳先生，現時一家三口以月租一萬元租住將軍澳彩明苑單位，他表示樓價及租金太高，小市民根本無法負擔，「如果將來個女結婚，要搬出去或者買樓，都唔知點算！最壞打算係我會排公屋！」他透露，現時租住的單位是親戚的物業，已較市價便宜，「雖然平一截，但都唔敢使錢，一家人連旅行都冇去，購物都好慳，差在食飯未使慳住！」他認為市民要「上車」，政府應該放寬條例，如居屋入息上限，「家限制成三萬蚊左右，根本就好易超過！同埋政府應該起多啲居屋！」
樓價及租金狂飆，令工作多年的市民未能建立屬於自己的「安樂窩」，何況是剛投身社會的年輕人；23歲剛畢業的段先生亦認為樓價太貴，被迫打消置業念頭，「家同屋企人住，但一直都想搬出嚟自己住，但租金實在太貴，我唔會租樓住，只好慢慢儲首期，但樓價唔跌，肯定買唔到！」他表示會靠自己儲錢，盡量不靠家人資助，但奈何樓市過於瘋狂，他認為政府要出手幫助市民，「我有留意開政策，但我覺得梁振英出啲招根本冇用，否則樓價都跌咗啦，我認為居屋都應該要起多啲！」
市民慨嘆樓價太癲，早於2000年置業的黃先生慶幸自己能以平價入貨，但即使物業升值獲利亦不敢換樓，「家供樓只係佔我收入三成，但我邊夠膽換樓？完全負擔唔起，我覺得政府應該增加土地供應，唔單止居屋，連私人樓都要增加，否則樓價都會繼續升，政府要出手壓樓價。」
至於持有物業的何太亦表示，樓價負擔太重，「我層樓就供完，但仔女層樓就未完，當初畀首期，我都要出錢幫吓手，否則後生嘅點買到？」她認為政府有責任幫助市民置業
麗港城漲租近23%最勁
租金持續上升，中原地產統計的全港85個大型私人屋苑，租金已連升八個月，累升17.5%，上月平均呎租達22.2元，再創歷史新高；觀塘麗港城今年租金升22.9%最勁，其次是沙田第一城及天水圍嘉湖山莊，分別升21.7%及20.4%。鰂魚涌太古城「包尾」，升幅僅13%。惟租金升幅仍落後於樓價，中原城市領先指數CCL今年升幅達22.4%。
市民心聲
最壞打算排公屋
「最壞打算係我會排公屋！現時一家人連旅行都冇去，購物都好慳，差在食飯未使慳住！政府應該放寬條例，如居屋入息上限，同埋起多啲居屋！」
樓價唔跌好難買
「一直都想搬出嚟自己住，但租金實在太貴，只好慢慢儲首期，但樓價唔跌，肯定買唔到！梁振英出啲招根本冇用，否則樓價都跌咗啦！」
