「女股神」劉央好耐冇蒲頭，噚日終於見佢去人保（1339）嘅投資者推介會，但佢講銀基（886）仲多過講人保，即使銀基最近發盈警，白酒品牌「酒鬼」爆塑化劑醜聞，佢仍堅稱白酒喺內地有剛性需求，銀基2014年會賺到10億云云，出晒力狂sell。
劉央仲好豪咁話，新世界發展（017）創辦人鄭裕彤掟銀基嘅貨，佢接晒，「報出來他減到5（%）以下的時候，我就把他最後的股票全買下來了，2700萬股，兩塊七毛四，都是彤叔最後一批貨，都是我買的。」接貨冇所謂，事關「我管30多億美金（超過234億港元），我投它才兩億多港幣，比例比較少，還有增持的空間。」
劉央一路講以上豪言時，一路打圈搓住個肚腩（圖），完全冇顧記者感受，其實佢係咪食滯咗呢？