想晉身18大、想選港區人大，都難過登天，但想一嚐國家領導人食開嘅盛宴，家陣就有機會喇，最平每位868蚊有交易，最貴2,288元，但只限馬會會員囉。馬會最近請到北京釣魚臺國賓館行政總廚郝保力來港，由今日起一連七日進駐跑馬地會所嘅廚房，炮製國家領導人款待外國元首嘅國宴佳餚。
郝保力噚日介紹菜式時話：「廚師嘅湯，就好似槍手嘅槍。」今次特別喺北京帶咗自家製嘅清雞湯底嚟香港，呢個湯底用老母雞同豬爪熬製最少八粒鐘，再將雞胸肉打成茸，混入湯中，之後用小火燉成。呢個上鷄湯底，用咗嚟製作一道全新菜式「琥珀桃膠燉遼參」，配上花生醬烹燉，佢話呢道菜「湯鮮、花生香，中西合壁」。
服務員練笑練到流口水
噚日馬會安排記者試食，不過現場廿多位記者，只得三條遼參，唔係好夠分。八方同事試過，但可能太細嚿，唔係好覺有花生味。其他推介嘅菜式仲有鵝肝冷頭盤，係用上等鵝肝製成糟香鵝肝，據講係國宴冷盤嘅經典。咁國家領導人有乜特別口味？郝保力就守口如瓶，唔肯透露「國家機密」。
同場推介嘅仲有釣魚臺「芳菲苑」服務員秦崢。佢喺大學畢業後，經選拔入圍，再經過三個月密集式培訓，先可以做到呢份工。佢話受訓時要學點樣先笑得自然、企得好睇，佢話每一個笑容都要煉上過百次，「有時口水都在旁邊流出來，還得繼續練」。仲未夠呀，佢哋仲要經常鍛鍊臂力，嬌滴滴嘅秦崢，家一個人可以拎到六個盤。
mailto:[email protected]
