瑞安房地產（272）老闆、「上海姑爺」羅康瑞同最美麗港姐朱玲玲下周二結婚四周年，雖然話過咗四年，但睇佢哋前日一齊喺佛山出席樓盤活動嘅眼神同舉動，依然有初戀無限feel，認真羡煞旁人。
佛山姑爺冇露兩手
佛山係詠春發源地，而羅康瑞15歲開始學詠春，所以新項目「佛山嶺南天地」順理成章包含詠春元素，姑爺仲粉墨登場拍咗條有關詠春嘅紀錄片，條片前日喺佛山首播。咁大件事，朱玲玲梗係現身支持老公啦。
現場所見，54歲嘅朱玲玲依然美麗，佢好似平時咁，攞住部單反幫老公影相，仲鬼咁專心，慌住會走漏眼，捕捉唔到姑爺最靚佬一面咁款。姑爺對朱玲玲嘅關愛之情亦溢於言表，睇佢望住朱玲玲簽名嘅眼神，一切盡在不言中啦。
查實兩人咁sweet都唔係冇理由，坊間一直話兩人低調苦戀八年，直至霍英東06年去世後，朱玲玲先讓戀情浮面。08年中兩人藉瑞房嘅上海樓盤活動正式公開戀情，隨即結婚，呢次朱玲玲以羅太身份出席佛山活動，心情唔知點呢？
可惜，64歲嘅姑爺以年紀大體力應付唔到、工作忙好少練習為由，冇喺佛山露番兩手，只係作勢擺pose畀記者同老婆影相咋。
李華華
mailto:[email protected]
