政治真係一日都嫌長，今年3月大家都以為唐營失勢，點知事隔八個月，一場十八大就起咗翻天覆地嘅變化。前日長實主席李嘉誠只係面帶笑容，忍口唔評論狼英嘅表現，噚日出席人大選舉簡介會嘅全國政協常委何柱國，道行當然唔及誠哥，難怪抵唔住頸吐出四個大字。
噚日何柱國趕住入場之際，記者不斷追問佢點評價狼振英，於是佢就邊行邊拋出四字真言：「心中有數」，然後一個箭步走人。到底佢心中有咩數呢？何柱國冇再講落去，但講得「心中有數」，都唔慌係好嘢啦。
跟住又有另一唐營全國政協常委陳永棋現身，陳永棋話家陣狼振英政府都上咗軌道，佢有信心等新班子磨合好就可以解決問題。八方無意揣測佢所講嘅軌道終點喺邊，不過一問到點睇換特首傳聞，係咪真係有此需要時，佢顧左右而言咁話「冇念頭，冇計劃，冇部署」。咁即係有冇需要，大家心中有數啦。