「李蓮英」最近紅爆政商界，今晚職訓局喺中華廚藝學院搞嘅滿漢全席籌款晚宴亦大玩清朝宮廷style，百位嘉賓到場後要換上大會準備嘅宮廷服，身邊侍應全部扮成太監、宮女上菜，相當過癮。
呢次係1977年以來，香港再有大型滿漢全席活動，傳統滿漢全席有108道菜，今次只有15道。有份搞嘅新光酒樓集團創辦人胡珠介紹，其中一款糖水用魚頭來做，骨膠原豐富，養顏又特別。
晚宴筵開十席，每席十人，每圍15萬，一早book爆晒。聽聞嘉賓都係飲食界同工商界人士，其中同職訓局合作嘅稻香（573）主席鍾偉平都會出席，唔知到時大家會唔會估吓邊位扮李蓮英呢？