【銅鑼灣時代廣場】周家蔚早前畀著名攝影師夏永康影咗輯真空大肚相，準備用嚟為慈善籌款出月曆，出到嚟嘅效果好好。佢雖然懷孕七個月，預產期喺出年1月，不過佢唔鍾意留喺屋企安胎，反而頻頻出動去入貨。前晚7點鐘左右，又見到周家蔚現身銅鑼灣時代廣場，今次喺佢身邊嘅唔係老公洪天明，而係一位男性友人，因為人來人往，所以家蔚都用隻手護住個肚行。
揸寶馬載兩女友
周家蔚同男性友人一路行一路講，行咗冇耐就發現咗記者，不過家蔚好友善望住記者笑笑口。跟住佢哋落咗車庫攞車，不過好奇怪，五分鐘之後當家蔚揸住架寶馬一系出嚟嘅時候，車上面換咗兩位女士，唔變嘅係家蔚繼續好有修養咁微笑望住記者。不過佢嗰肚咁大仲要揸車，就真係要小心，因為好易頂住個軚盤喎！
採訪、攝影：梁繼光
