竟然有人夠膽話李超人一世冇發達？冇錯，長和系主席李嘉誠噚日喺北京出席長江商學院十周年慶典時，就爆出呢個幾十年前嘅驚世預言，驚嚇度仲勁過瑪雅人估今年12月21日係世界末日。
話說當年超人14歲，有個自稱識得睇相嘅同鄉同超人阿媽講，超人眼眸無神、骨架瘦弱，要飛黃騰達肯定冇佢份，安份守己仲可以勉強謀生咁話。結果超人30歲，就憑塑膠花賺到第一桶金，勉強謀生可能係嗰位同鄉。
噚日撞正舉行港區人大代表選舉會議，超人作為港區人大主席團成員都請假，證明佢幾咁重視長江商學院。但呢個商學院最近被指為小三溫床，傳聞萬科主席王石同SOHO中國（410）董事長潘石屹，都係喺度識女仔斷正。