狼政府辣火頭辣上癮，搞到香港人忙到氣咳，個個禮拜去政總示威。社運老手黎則奮、反國教絕食教師韓連山同何芝君成立「保衞香港自由聯盟」，頭炮係發動市民齊齊交少十蚊稅，抗議用血汗錢出糧畀班庸官，要求謬波、吳得掂同蘇卡片下台。如果搞得成，狼政府又再成功爭取創造歷史。
聯盟今日會開記者會，嚟緊周末喺港九新界擺街站。八方請教過稅務學會理事王銳強，佢話交少十蚊都算違反《稅務條例》，理論上會追加5％罰款，即係五毫子，半年再唔交就double罰款，即係一蚊。稅局有權向法庭申請凍結戶口夾硬扣番筆錢，最嚴重係發禁止離境令，直至收齊筆數為止。如果真係好多人響應，可能癱瘓稅局電腦運作，「不過政府做嘢都講成本效率，會唔會花咁多人力物力去追呢筆數，就係政治考慮」。
國際早有和平抗爭
香港人對扣稅或者罷交稅呢類不合作運動好陌生，但喺160年前哲學家梭羅（Henry David Thoreau）已做過。佢唔想貼錢畀美國政府同墨西哥開戰，寧願坐監都唔肯交稅。印度殖民地政府只准人民買公家鹽，徵收勁重鹽稅，聖雄甘地拉大隊去海邊自製私鹽。何秀蘭同八方講，工黨會派代表了解扣稅詳細計劃，再決定係咪參加。
話時話，韓連山、何芝君都好似退休冇耐，究竟係咪仲要交稅呢？八方就識得一位政界小人物，佢由04年開始，年年都係報稅表寫明「no vote,no tax」。佢家陣欠稅局20幾萬，冇得出境、凍結咗所有戶口、僱主要用現金出糧比佢。咁抗爭係咪值得？佢就話每當見到冇普選、高官廢噏條氣就唔順。如果有普選，佢會一次過交回欠稅。
mailto:[email protected]