各位旅客，歡迎乘搭豐田Alphard航空，本班是特別指定航機，全機均附設頭等艙的設備，包括全躺式頭等座椅、閱讀燈及LCD影音系統等，無論旅程時間多久，愛睡還是愛娛樂，也確保大家萬里無憂。現在準備出發，請大家慢慢享受一個愉快豪華的旅程。
記者：許維雅 攝影：潘志恆
模特兒：Aliz@ 富國盛世娛樂 Hair：Zap@ XENTER
座椅溫度角度校到啱
不惜花幾倍金錢搭飛機坐商務、十幾倍金錢坐頭等的旅客越來越多，因為只要坐過就會明白一個寬敞舒適的乘坐環境對於長途旅程有幾重要，十幾個鐘逼在經濟艙真係秒秒捱苦。其實唔單止長途機，長途車同樣難捱，向來是中港車熱門首選的七人MPV豐田Alphard，今代新推一部名為Alphard First Class的特別版，顧名思義為全新Alphard 350加入多項新增配備，務求令車廂達至頭等艙的舒適效果。要有坐頭等般的享受，首要當然是一張可以完全平卧的飛機椅，Alphard中排所配置的Ottoman電動椅，調低時雖未至於完全平坦，但配合環抱式頭枕、小腿墊及腳墊，於車長達4,875mm的車廂，絕對有足夠空間伸展讓你發一個甜夢。First Class特別版更會於座椅手枕增添溫度調校及兩組記憶功能，無論溫度還是角度的照顧都更加貼心。加上特別版刻意強調為座椅選用頂級皮革物料，未知是否心理作用作怪，感覺的確零舍軟熟滑溜。
閱讀燈超貼心
為了增加頭等特別版的氣派，全車鋪了酒紅色的地毯添氣氛，又無米白色咁易污糟。長途旅程唔瞓覺，最佳節目當然是睇碟，中排頂置10吋LCD影音屏幕，連同頂級環迴立體聲音響系統打造的迷你影院，為你提供視聽娛樂。愛閱讀的，特別版的中排椅獨有閱讀燈配備，方便夜晚北上時打發時間或閱讀文件。睇到攰攰哋想要點小吃飲品提提神，除兩座之間有可摺式小桌方便開餐之外，前座更獨配一個飲品小櫃兼備冷暖功能，冬暖夏凉的照顧連飲品都兼顧埋，問你服未！加埋新一代Alphard新增可淨化補濕的Nanoe納米離子空氣淨化冷氣、可以防UV的玻璃窗，細心完善程度更勝飛機頭等艙，自備一張毛氈及一位空姐上車送上飛機餐，實在幾可亂真。唯一唔同的，只可以話輸出274匹馬力的3.5公升引擎仲未識飛呢。
Check! 中排椅左右邊張好？
想將中排座椅調校至躺得最舒服？最佳的方法就是將前座推到最前，務求爭取空間方便腳部伸展。廠方細心為司機席旁的座椅增添電動操控按鈕，方便老闆們將前座推前及半摺合，咁你家知道跳上車時揀邊張中排椅坐啦！
豐田Alphard First Class
引擎：3,456cc V6
馬力：274PS/6,200rpm
扭力：340Nm/4,700rpm
傳動：六前速超級電控自動波+/-
售價：$799,900
查詢：2305 4555（皇冠車行）
