喺不少龍友心目中的攝影神器Leica，徐家輝醫生兩年前一接觸便愛不惜手，不斷入手Leica相機之餘，更開埋攝影展。今年Leica推出全新世代Leica M，呢個超級Fans兼貴賓當然可率先試玩，雖然未能細看真正相片質素，但只睇其突破科技及嶄新設計，已經足夠叫徐醫生與一眾粉絲流晒口水！
記者：韓繼聰 攝影：伍慶泉、林栢鈞
重新命名 全新功能
叫得Leica M而唔叫M10，醒目粉絲都估到Leica有意為M系重新出發。新機下年初才推出，但今個月初就喺香港曇花一現過，俾傳媒及VIP們率先試玩。徐醫生當然有份試，他興奮咁話：「Leica一向偏重機械工藝，但今次Leica M加入好多全新功能，連科技都有大突破，令人好期待！」佢所講嘅突破之一就係Live View，可實時取景及對焦，唔再單靠ViewFinder，係少咗啲Leica味，但新手應該好Buy。加上支援1,080p全高清拍片，令一直只可影相嘅M機功能更全面，想像吓用Leica靚鏡加Full Frame拍片，真係完全無得輸。
Leica M更首次支援R鏡連動，「可惜我無玩開R鏡，受惠唔到，但不少老玩家應該好開心。不過新機棄用CCD轉用CMOS，相片未過落電腦睇，相質係點真係要睇過先知。」他似乎對呢塊Leica與CMOSIS合作研發嘅CMOS有啲保留，事關Leica一向堅持用CCD係因為佢嘅細節、層次及色彩，但Leica強調呢塊2,400萬像CMOS低耗電兼質素與CCD一樣好，配合埋同旗艦Leica S相同嘅Leica Maestro處理器，相信唔會差嘅！
平價M-E 多機齊發
相對只玩過一晚嘅M，徐醫生對M-E就熟悉得多，因為M-E實為M9-P的簡化版，「佢嘅基本功能其實同我用開部M9-P一樣，只係少咗個框線預視掣，少啲方便，但平一截，新手入門幾抵玩。」相質方面，徐醫生更有讚無彈，事關佢相展中嘅相全都出自M9-P，M-E用上與M9-P一樣嘅1,800萬像素CCD，影過就知有保證。另外，Leica今次亦同時晒冷多部新機，較注目嘅當然有貴到飛起嘅Leica S，採用新CCD及處理器，更將緩衝記憶體提升至2GB，令Leica S的相質更好之餘，對焦及連拍亦更快。而X2 Paul Smith特別版就以顏色吸眼球，用上Leica少見嘅橙及黃，加上全球限量1,500部，潮人要擁有！
浪攝巴黎搞影展
徐醫生可謂全情投入Leica，兩年間已買下M9-P、M Monochrom及S2三機多鏡，淨計機已超過30萬元，「有俾老婆鬧㗎，但只要睇過Leica影出嚟嘅相，層次感同色彩實在比一般相機好好多，無得唔中毒！」他早前趁與家人去巴黎旅行，以寫實方式影了批靚相，與Leica代理興華合作搞影展，「好多相都係晨早起身自己去影，之後再同家人逛街，輯相得來不易。」所以話影靚相要有靚機之餘，勤力用心一樣重要。
「The Breathless City」攝影展
地點：香港國際機場 Terminal 2
展期：即日至11月30日
查詢：興華拓展（3650 0668）