狼英做特首、西環亂港，令到部份香港人特別懷緬英國佬管治時嘅廉潔、高效等核心價值。前「事頭婆」英女皇伊利沙伯二世，將會喺下月九日派佢隻馬重臨香江。真係一匹馬呀，係佢隻愛駒「嘉登行宮」。
戰績麻麻 名氣搭夠
女皇御用練馬師司徒德爵士，為呢隻馬報跑12月9日沙田馬場香港盃，成功入選。香港盃總獎金2,200萬元，如果「嘉登行宮」勝出，馬主英女皇可以袋880萬。
賽馬向來係英國皇室喜歡嘅活動，英女皇自己養馬多年，但就首次有名下馬匹遠征香港。「嘉登行宮」亦係首次離開英國作賽。呢隻馬跑過九次贏過三場，最叻贏二級賽，戰績唔算好勁，但因為英女皇嘅關係，名氣就夠晒響。今次相信女皇隨隊觀戰嘅機會唔高，但就唔排除有其他皇室人員嚟睇比賽。