仲記得「丹麥甜心」禾絲妮雅琪，上星期喺香港高球公開賽做「跟得女友」，為男友麥艾萊打氣。甜蜜嘅場面又有機會出現，不過今次係禾琪落場打波，對手仲要係「中國金花」李娜！自香港網球挑戰賽今年停辦後，網球迷都怨香港冇晒比賽，望穿秋水終於等到，出年3月4號晚上將首次喺機場亞洲博覽館舉行表演賽，娜姐自去年歷史性贏法網後，首次嚟香港比賽，禾琪雖然唔再係「1姐」，但名氣勝在夠響，戲碼都幾吸引。同場加映一場元老賽，由梅禮現任教練蘭度大戰麥根萊。今次比賽喺室內場上演，6,500個座位睇怕好快就爆滿，門票400至1,350蚊，下星期一（26日）喺快達票售票網、通利琴行都有得買。