繼新地（016）大股東兼聯席主席郭炳江上周喺股東會俾兩成股東反對連任董事後，新世界發展（017）創辦人鄭裕彤位孫女鄭志雯，噚日亦有類似遭遇，22%股東反對佢連任董事，其餘六位尋求連任嘅董事全部有超過九成股東贊成，包括志雯嘅二叔鄭家成，同堂哥鄭志恒都係高票連任。
31歲月薪50萬
鄭志雯08年加入新世界，今年3月成為執董，掌管酒店業務，佢今年初同已故鋼鐵大王龐鼎元孫仔龐建貽結婚，婚後大住肚都繼續返工，聽講明年初生得。噚日股東會咁多股東反對佢連任，究竟係唔妥佢得31歲太後生，定係月薪50萬呢？
鄭志雯阿爸鄭家純近日喺北京開會，噚日冇睇住個場，睇嚟純官返來要了解吓先得喇。至於入院一排嘅彤叔，鄭志剛就話阿爺情況好穩定，多謝大家關心咁話。