里昂證券不時搞花臣，年初有風水指數報告，臨近聖誕節又有聖誕樹報告，唔係講笑，呢份報告教人買真嘅聖誕樹，唔係買股，純粹畀客戶輕鬆一番。
分析揀聖誕樹秘訣
雖然話係一份輕鬆嘅報告，但撰寫人相當專業，係里昂喺美國嘅林業股分析員Mark Connelly，呢份已經係里昂第三年出嘅聖誕樹報告，教人因應個人喜好、有冇敏感、屋企有冇細路仔等因素去揀唔同品種嘅真聖誕樹。
報告對於歐美國家客戶應該有用啲，事關佢哋係堅會買大大棵聖誕樹返屋企，香港地少人多，大戶人家都未必會買真嘅聖誕樹放喺屋企，可能顧及呢班客仔嘅需要，Connelly亦有介紹鋁製同假聖誕樹嘅背景資料，相當有趣。
但佢始終認為，若屋企有細路、地方夠大、價錢又合理的話，堅嘢始終好啲。