快速消費品股（consumer staple）一般在市場上估值都好高，隻隻市盈率都20倍以上，睇落好嚇人。一來是這些股份通常都多長線基金揸，流通量本身唔高，二來呢啲公司通常都擁有全國知名品牌，如康師傅（322）、旺旺（151），好似華創（291）的華潤萬家同雪花啤酒咁，一講個名大家都曉，唔似得啲男裝又或者運動衫，話自己邊個市邊個鎮做得好掂，但查實好多人都唔知佢係乜水。
這些公司過去幾年都總算交到功課，最多有時原材料價格高得滯，會賺少啲，但通常都keep到唔錯增長。不過最近康師傅同華創的業績，就齊齊差過預期，明明原材料價格回落，有利大反彈，但最後銷售就居然差到令人失晒預算，自然增長（organic growth）的動力令人擔憂。
以往市況好，個個都有增長，競爭情況先唔明顯；但現在市場只是稍稍放慢，至發覺原來周街都係強敵環伺，生意惡做。現時市場預測棕櫚油、膠粒等原材料價格，明年回升機會較高，海迪諗唔到有咩利好因素，再可以支持這些股份如此高的估值。
海迪