林子沛，28歲，城大創意媒體學院畢業，熱衷以「惡搞」方式關心社會。過去多次化身網絡毒男「葉蔗燉」，拍攝重口味短片放上網，推介「被消失」的老字號，爆冷受歡迎。今年初因為一次青蛙之旅，辭工全職拍獨立短片，頭炮《心跳．回憶》，貫徹他最關心的保育議題，但就動員親朋細妹，組成美少女兵團。醜男一夜變靚啲，他有話要說。記者：呂麗嬋
「由細到大，我讀書唔叻，會考12分，讀副學士升上去嗰隻。讀書比唔上人，但講到諗橋我就唔輸蝕。城大畢業後，我去咗本年輕人雜誌做記者，介紹老字號：賣首飾嘅『朱義盛』光榮結業、冇乜嘢人再關心嘅粵劇，仲有逐漸式微嘅上海理髮店。城市發展，好多嘢被消失，總係唔捨得。但我成日諗，淡淡哀愁有乜嘢用？可以打動原本懷舊嘅人，但對於唔多關心嘅一批人，根本嘥氣。
藉虛擬人物介紹老店
於是就有『葉蔗燉』呢個虛擬網絡人物，個名求其作，但求地道親切。一手包辦造型：戴茶色眼鏡、衣着老土、動作誇誇張張。由佢去介紹老店，起碼可以吸引眼球。我喺大學拍片，剪埋段短片放上網，玩票性質，竟然吸引到好多人點擊。阿燉成為我另一個身份。只要面皮夠厚，惡搞原來真係有市場！
做咗幾年葉蔗燉，轉咗去做保育專題。東北發展未鬧哄哄，有次參加馬寶寶農場生態團，一晚竟然見到上千隻青蛙，好驚！但嗰晚佢哋喺田度跳來跳去，我一樣驚驚青青，但就冇諗過趕佢哋走，因為呢個根本就係佢哋嘅地頭，我哋反而只係路過嘅訪客。
構思到拍攝花近一年
由菜園村到新界東北發展，講緊嘅其實都係青蛙故事。嗰時我就諗，葉蔗燉呢條橋得，點解唔搵另一個爆區？政府發展，開出經濟利益鴻圖，不如就拍一個關於糖衣包裝嘅故事：Cosplay美少女帶住聽筒，為已死亡嘅舊物確定死亡時間，載歌載舞。
《心跳．回憶》由構思、籌備到拍攝，花咗近一年。今年初我辭埋職專心拍攝，又申請咗藝發局資助。製作團隊嚟自五湖四海，有做音樂嘅，亦都有好似我咁做開主流媒體，大家不計酬勞，但我哋有共同信念，希望以輕鬆方法講一個大家都明白嘅故事，吸引到漠不關心嘅人，喺咁嘅前提下，何妨惡搞？」
林子沛有關《心跳．回憶》的面書網址： http://www.facebook.com/heartbeat48
《心跳．回憶》預告片網址： http://www.youtube.com/watch?v=gJzMyVHttTo
「葉蔗燉」惡搞片段： http://www.youtube.com/watch?v=OINFRQlTGTs
