習近平好快就會升呢做國家主席，人所共知香港首富長實集團主席李嘉誠同習總極為老友，習總坐正，誠哥有面，相信狼振英就閉翳嘞。
噚日誠哥現身潮州商會晚會時，滿面笑容，心情靚靚，不過佢把口就密過密實袋，問乜都話唔評論。
晚宴畀面撐場嘅最高級官員都係政務司司長林鄭月娥，狼振英無緣出席，頂多都係題辭咋，唔知係咪費事令誠哥眼冤。
記者蜂擁而上問誠哥，狼振英做唔做到五年特首、習總坐正會唔會令香港再現地產霸權、買家印花稅影唔影響樓市等，誠哥一概唔回應，佢只係話「我如果講一句呢，就有一百句要問㗎啦」，誠哥果然心水清。