10.1海難之後，船公司要為船隻安全解畫，次次都講到氣咳。好似新渡輪有位唔願意公開身份嘅極高層就覺得，家社會對船隻安全嘅討論已經本末倒置，勞氣到爆出金句︰「每年都有隕石跌落香港啦，唔通要裝定飛彈咩？」
金句王仲話，平日政府同船公司好少宣傳船隻逃生資訊，結果一有海難，大家印象都係電影《鐵達尼號》咁，諗住攬住件救生衣實有救，仲以為救生衣唔放凳底就係錯。金句王解釋，救生衣擺位查實有根據，好似高速船船程短，乘客多數黐實個位，放凳底最好；慢船就預左乘客通船走，放響救生通道最方便。不過命仔攸關，緊張都係人之常情，好難話你委屈囉！