噚日個市認真嚇人，高開倒插再抽上，用過山車形容絕不為過。有炒友話中美股市齊齊腳軟，恒指只係由高位回落3%，港股其實仲係強勢，呢點唐牛絕對認同，如果從個別股份睇，好多更加頻頻破頂，REITs就係最佳例子。
噚日推介嘅深控（604），成功拗腰兼創今年收市新高，高息因素發揮效用，今日推介另一隻高息股筆克遠東（752）。呢家主打展覽及市場推廣嘅企業，自04年以來年年有息派，近年更加有鋪派特別息嘅癮，現價息率6厘，高過唔少REITs。截至今年4月底，筆克半年賺9290萬銀，按年增長13%，下半年入賬項目包括麗水世博、倫敦奧運、新加坡一級方程式大賽等大型項目；加上擁有大客如高盛、華為、聯想（992）、三星等，下半年業績相信會有增無減。筆克近日創近5年新高後稍作回吐，今年累升42%，皆因有高息支持，候回試10日線1.94元吸納，揸到全年業績放榜，隨時有意想不到效果。
唐牛