【上環】大美人林青霞平時深居簡出，但前晚就見佢孖住好友、狄龍老婆陶敏明一齊去上環開餐。前晚6點半，記者見青霞部白色Benz喺蘇豪區經過，之後司機車咗青霞去上環必列者士街嘅新派日式串燒餐廳Yardbird，原來青霞載埋陶敏明同女助手一齊，青霞助手送咗青霞同陶敏明入餐廳之後就走先，唔阻住青霞同好姊妹開餐傾偈。前晚見青霞換咗個新髮型，佢將頭髮再剪短，感覺好清爽。
坐餐廳角落
Yardbird其實有兩層，侍應安排青霞佢哋坐喺樓下比較人少嘅角落，一坐低青霞只係飲清水，跟住就由陶敏明點嘢食。青霞兩個人食晚飯，見佢哋叫咗一鍋飯同串燒等美食。青霞食得好淑女好斯文，仲邊食邊同陶敏明有講有笑。食到8點左右，青霞就埋單走人，出門口嗰陣，青霞仲同陶敏明手拖手，真係相當老友，之後司機就揸車嚟接咗佢哋走。
採訪、攝影：朱志聰、吳耀輝
