港股近排陰陽怪氣，挨近年尾似乎唔係短炒時，惟有買住優質股，坐定定咪搞咁多動作。
有刨過今年上市公司業績，都會發現做美國生意好過做中國生意，所以創科（669）甚至敏華（1999）業績以至股價表現都相當唔錯，但唔代表買中資、民企股冇前途，最重要係你買嘅公司喺行業中有競爭力，可以吞併行家嘅市佔率。你睇半導體行業近年何曾風光過，但製造半導體設備嘅ASM太平洋（522），金融海嘯低位20蚊，家90蚊，就知揸優質股嘅好處。
內地手機業競爭大，但中國無線（2369）2010年跑出後，家業績又開始復蘇，股價亦升得相當靚仔，高盛預計旗下酷派今年第四季會成為國產OEM智能手機大哥，佢嘅手機持續佔有重要市場地位，證明具競爭力。
曾幾何時，大家都怕蘋果iPhone會打殘國產手機，家一嚟證實國產平價手機有生存空間；二嚟iPhone 5除咗個Mon長咗，新意欠奉，喺內地嘅熱潮冇以前咁勁，中短期內，有利酷派繼續搶佔市場。
勢造國產手機一哥
中國無線今年上半年純利升28%至1.53億元人民幣，每股盈利7.1分，升幅明顯低過收入嘅1.05倍增幅，顯示佢嘅薄利多銷策略，的確令每部機嘅利錢減少，但既然市佔率有升冇跌，盈利又升，就證明策略成功。
高盛估計，中國無線下半年每股盈利8.9仙，預測市盈率15.6倍，對有增長、有競爭力嘅手機股嚟講，估值有上升空間，既然2010年尾有本事升上5.80元，今轉應該唔會太差，分段買入博升到3蚊唔過份，差唔多到價至考慮上調目標。
至於長遠風險，如果iPhone喺內地銷售熱潮降溫，分分鐘考慮開發低端iPhone，會係中國無線最大嘅挑戰，但未有耐發生。另外，中國無線市佔率可能升到去國產OEM手機第一，始終有日銷量基數變高，盈利就唔能夠單靠薄利多銷而快速增長，所以呢隻股始終係揸中線好過長線，既然有勢，就揸實等收成。
晉佳
本欄逢周一、三及五刊出