優雅音樂襯托下，我拿起一捲鐵線，使勁緊箍你的脖子，再哼着歌，直至你慢慢斷氣為止。講到暴力、血腥嘅遊戲多如繁星，但無聲又無息咁得人驚，我只諗到多年前嘅電影《Hitman》！最近佢再移植落家用遊戲，還深化暗殺技巧，好似觸電、割喉、淹死，甚至用硬物擊斃等上百招，你諗唔到嘅，佢都有！ 記者：陳國輝
美國唐人街黑幕
故事發生於美國芝加哥，黑幫無處不在嘅唐人街。Agent 47因接到一宗暗殺任務，繼而發現原來一直被信任嘅人出賣，仲差點搞到無命！為尋求真相，47唔只救番唯一線索──Victoria，更決意背叛組織，大開殺戒！
多士爐浸浴缸電瓜你
初次上手，唔講仲以為玩緊《Metal Gear》系列！尤其暗殺系統嘅設計，由匿藏、從身後箍頸，以致藏屍等過程，敵人嘅Alert系統相當強，稍有不慎即被對方發現，緊張程度可謂不相伯仲。不過，數到暗殺用嘅武器和招式，《Hitman》明顯豐富好多，最經典係用多士爐放進浴缸，令對方觸電致死；或可自行設計高空墮物嘅死亡陷阱，令人誤以為意外等。另一過癮係，主角「47」在遊戲內可拎起唔同物件做武器，例如生果刀、繩索，甚至收音機；無聲無息下，隨時可致人於死地，至於點先唔俾人察覺，呢樣就考你創意喇！
如何令摺凳呢啲道具成為十大武器，純考個人智慧，但當47手無寸鐵情況下，又可以點？遊戲原來提供了CQC（近身格鬥術），只要跟足畫面提示，順序按下「O」、「X」等掣，已經可輕鬆幹掉敵人。
連發系統一殺多人
講到底，47最型係拎住雙槍擺甫士，若然你係《Hitman》粉絲，也希望可拎起手槍殺過痛快！所以，遊戲特別追加Tag Shoot系統，限定時間內，只要你快速鎖定目標，再按下射擊，跟住會出現恍如「百人斬」嘅華麗動畫，當你腹背受敵，面對數十敵人時呢招最啱用！另外，在暗殺行動時還加入一項「Instinct Mode」，佢類似熱能探測器功效，能穿牆睇到對方位置，更可深入了解敵人嘅巡邏路線，如果你初次接觸呢隻遊戲，值得一試。
《Hitman: Absolution》
平台：PS3、XB360
類型：動作+射擊
開發：Square Enix / Io-Interactive
售價：$388（PS3）/$389（XB360）
