內地噚日再傳房產稅快出台，內房股普遍高位回落。以深圳為基地嘅深圳控股（604）係少數能保持升幅，市況偏淡依然企硬，值得望多兩眼。
深控10月銷售額及面積按年分別增長1.4及1.5倍，首10月累計銷售額50億元人民幣，相當於全年目標83%，達標應無難度。早前與沿海家園（1124）互換地產項目，以優化資產結構，交易完成後可錄得負商譽入賬，料利好業績。阿爺全力發展前海項目，深控喺深圳擁有大量土儲，前景看高一線。
睇估值，深控現價年度化市盈率4.3倍，以中型房產股嚟講絕對合理，最重要係派息穩定，自2000年起每年派息，從不間斷，現價計年度化息率高達6.3厘，好過唔少藍籌，防守力一流。睇圖表，深控噚日一度搶高逾4%至2.29元嘅今年新高，收市升幅回順至1%，但仍企穩10日線。現價2.22元進場，突破2.30元再加一注，以0.6倍PB作目標，可見2.57元，潛在升幅16%。
唐牛