何超儀係香港潮人，唔怪之得連世界著名財經台Bloomberg都嚟香港訪問佢，超儀獲安排朝早6點揚帆出海，之前一晚佢連水都唔敢飲，怕出現水腫，到第二朝起身，佢又唔敢食早餐，但超儀上咗船，發現電視台準備嘅精美金箔點心同燕窩，搞到佢終於忍唔住食。
舊建築報銷
當日Bloomberg嘅節目訪問何超儀，同場仲有鄭兆良同住好啲G.O.D.嘅老闆楊志超，佢哋三個大講香港創意文化，主持人問佢哋97回歸後，香港創意文化同97前有乜分別？超儀同另外兩位嘉賓一致認為：「明顯係倒退咗，家嘅香港人冇咗膽量，唔知由幾時開始，創意文化人只會做一啲只會流行一年嘅嘢出嚟，已經唔會諗吓點樣做經典文化出嚟，香港已經變成消費型社會，又唔識搞保育，以前有殖民地色彩嘅舊建築，幾乎俾人拆晒，真係好可惜。」
撰文：馮仁昭